ការគេងយប់ បានប្រែក្លាយជារឿងពិបាកមួយ សម្រាប់មនុស្សមួយចំនួន ព្រោះតែទម្លាប់នៃការរស់នៅ ការងារ និងការសិក្សាមានការប្រែប្រួល។ ការងារមមាញឹកជាងមុន ប្រើប្រាស់ប្រព័ន្ធសង្គមច្រើន ហើយធ្វើកិច្ចការ ឬរៀនសូត្រដល់យប់ៗ នាំឱ្យមនុស្សគេងកាន់តែយប់ជ្រៅ ឬគេងលែងលក់។

យូរៗគេងមិនលក់ម្ដង ជារឿងធម្មតារបស់មនុស្ស តែបើមានបញ្ហាគេងមិនលក់ (Insomnia) រយៈពេលយូរ វាជាបញ្ហាធំ។ ទទួលដំណេកមិនគ្រប់គ្រាន់ បង្កហានិភ័យធ្ងន់ធ្ងរដល់សុខភាព រួមមាន ការលើសទម្ងន់ ជំងឺបេះដូង និងជំងឺទឹកនោមផ្អែមប្រភេទ២។ នៅមានបញ្ហាច្រើនទៀត ដូចជា ការលែងឃ្លានអាហារ វិលមុខ ខ្សោយកម្លាំង ងងុយដេក ពោះមិនល្អ ស្ងួតមាត់ ឈឺក្បាល និងយល់សប្តិប្លែកៗ។ នេះបើយោងតាមគេហទំព័រ​របស់សកលវិទ្យាល័យវេជ្ជសាស្ត្រ Harvard។

គេហទំព័រ Healthline ក៏បានសរសេរថា ការសិក្សាមួយ បានរកឃើញថា មនុស្សដែលមានបញ្ហាគេងមិនលក់ ប្រឈមនឹងហានិភ័យជំងឺគាំងបេះដូង ៦៩% ខ្ពស់ជាងធម្មតាផងដែរ។ ​អ្នកជំងឺទឹកនោមផ្អែម ដែលមានបញ្ហាគេងមិនលក់ ប្រឈមនឹងហានិភ័យគាំងបេះដូង គុណនឹង២ ធៀបនឹងមនុស្សធម្មតា។

ទាំងនេះ ជាគន្លឹះ ៨យ៉ាង​របស់អ្នកវិទ្យាសាស្ត្រ នៅសកលវិទ្យាល័យ Harvard សម្រាប់ជំនួយដំណេក៖

១. ហាត់ប្រាណ

ការហាត់ប្រាណ នៅពេលព្រឹក ឬការដើរ​ជាប្រចាំ រៀងរាល់ថ្ងៃ ផ្ដល់អត្ថប្រយោជន៍ពិសេស ចំពោះសុខភាពអរម៉ូន និងចង្វាក់បេះដូង។

២. កុំប្រើគ្រែគេង ធ្វើសកម្មភាពផ្សេង ក្រៅពីការគេង

កុំប្រើគ្រែគេង ជាកន្លែងធ្វើការ មើលទូរទស្សន៍ និយាយទូរស័ព្ទឱ្យសោះ។ ទុកគ្រែគេង សម្រាប់គេង ឬការរួមដំណេកជាមួយដៃគូ តែមួយមុខ​បាន​ហើយ។ កុំឡូកឡំទម្លាប់ ឬសកម្មភាពប្រចាំថ្ងៃ ជាមួយនឹងការគេងនៅលើគ្រែ នាំឱ្យប៉ះពាល់ដល់ទម្លាប់គេង។

៣. រៀបចំបន្ទប់គេងឱ្យស្ងប់ និងងាយស្រួល សម្រាប់គេង

ជៀសវាងអ្វីដែលរំខានដំណេក ដូចជា ទូរទស្សន៍ ឬឧបករណ៍មួយចំនួន ដែលអាចប៉ះពាល់គុណភាពដំណេក។ រៀបចំបន្ទប់ឱ្យស្ងាត់ ងងឹត និងមានសីតុណ្ហភាពល្មម នោះរាងកាយមនុស្សគេងបានលក់ស្រួលល្អ។

៤. បង្កើតទម្លាប់គេង

ទម្លាប់គេង មានន័យថា អ្នកគួរធ្វើរឿងមួយចំនួន ជាទម្លាប់មុនចូលគេង។ អ្នកអាចអានសៀវភៅ ផឹកទឹកដោះគោក្ដៅៗ ងូតទឹក ឬស្ដាប់ភ្លេងបន្ទន់អារម្មណ៍ ដើម្បីជួយអ្នកសម្របរាងកាយ និងសម្របចិត្តសម្រាប់ការគេង។

៥. ញ៉ាំអាហារទ្រាប់ពោះ

ប្រសិនបើអ្នកឃ្លានកូរពោះ នោះគេងមិនលក់នោះទេ។ បើឃ្លានមុនពេលចូលគេងតែម្ដង អ្នកគួរញ៉ាំក្នុងបរិមាណតិចតួច។ ញ៉ាំផ្លែប៉ោមមួយ ឬនំប្រៃ តែព្យាយាមកុំញ៉ាំច្រើនពេក ក្នុងរយៈពេល ២ ទៅ ៣ម៉ោងមុនដំណេក។

៦. ជៀសវាងជាតិអាល់កុល ឬកាហ្វេ

ជាតិអាល់កុល និងជាតិកាហ្វេអ៊ីន ជាសារជាតិរំខានដល់ចង្វាក់ដំណេក នាំឱ្យគេងមិនលក់។

៧. កាត់ស្ត្រេស

ស្ត្រេសយ៉ាងណាក៏ដោយ អ្នកគួរតែបន្ធូរអារម្មណ៍ និងអនុវត្តលំហាត់ប្រាណដង្ហើម ដើម្បីឱ្យគេងបានលក់ស្ងប់។

៨. ពិនិត្យសុខភាព

ប្រសិនបើអ្នកឃើញថា អ្នកមានបញ្ហា ដែលអាចបង្កផលរំខាន ធ្វើឱ្យគេងមិនលក់ អ្នកគួរពិនិត្យសុខភាព និងព្យាបាលឱ្យបានត្រឹមត្រូវ។ បញ្ហារំខានក្នុងដំណេក មានដូចជា ជើងកម្រើកខ្លាំង ស្រមុក ឆ្អល់ក្រពះ ឆ្អល់ទ្រូង ក្រហាយបំពង់ក គឺជារោគសញ្ញាជើងមិនសម្រាក ជំងឺគាំងដង្ហើមពេលគេង និងបញ្ហាច្រាលជាតិអាស៊ីត។

លោកអ្នក ក៏អាចប្រើថ្នាំជំនួយការគេង ដែលមានសុវត្ថិភាព ផ្ដល់ផលប៉ះពាល់តិច តាមការណែនាំរបស់វេជ្ជបណ្ឌិតផងដែរ ដើម្បីដោះស្រាយបញ្ហាគេងមិនលក់៕

ប្រភព៖ Harvard Medical Health https://www.health.harvard.edu/ & Healthline https://www.healthline.com/

រក្សាសិទ្ធិ©ដោយ៖ ពេទ្យយើង