ក្រោយការប្រឹក្សាជាមួយក្រុមអ្នកជំនាញ ជាច្រើនលើកច្រើនសា​ អង្គការសុខភាពពិភពលោក (WHO) បានសម្រេចហៅជំងឺអុតស្វា ដោយឈ្មោះថ្មីថា «mpox» ដើម្បីជៀសវាងភាសារើសអើងលើប្រព័ន្ធអ៊ិនធើណែត។

WHO បានប្ដូរឈ្មោះជំងឺអុតស្វា ក្នុងភាសាអង់គ្លេស «Monkeypox» ទៅជា «mpox» ដោយលុបពាក្យ ដែលសំដៅលើសត្វស្វាចេញ ដើម្បី​បញ្ឈប់នូវការយល់ច្រឡំ ក៏ដូចជារើសអើងសត្វស្វា។ ទោះជាយ៉ាងណា ការប្ដូរឈ្មោះ និងប្រើឈ្មោះថ្មីនេះ  អាចមិនមែនជារឿងងាយស្រួលឡើយ ដោយហេតុថាឈ្មោះ Monkeypox គឺជាឈ្មោះដើម ដែលគេបានប្រើជាច្រើនទសវត្សរ៍មកហើយ។

ករណីជំងឺអុតស្វា ដែលឆ្លងលើមនុស្ស ត្រូវបានគេរកឃើញ នៅក្នុងឆ្នាំ១៩៧០។ ជំងឺនេះ កើត​ចេញពីសត្វស្វា។ ទោះជាយ៉ាងណា មេរោគនេះ ក៏បានឆ្លងលើសត្វផ្សេងៗផងដែរ ហើយក្នុងនោះ គឺពពួកសត្វកកេរ ដែលជាសត្វ ដែលឆ្លងញឹកញាប់បំផុត។

មកត្រឹមពេលនេះ WHO បានកត់ត្រាករណីជំងឺអុតស្វា ឬ mpox ចំនួន ៨១ ១០៧នាក់ និងស្លាប់ ៥៥នាក់ នៅក្នុងឆ្នាំ២០២២ នៅក្នុងប្រទេសចំនួន ១១០៕

ប្រភព៖ WHO II https://www.who.int/, CDC II https://www.cdc.gov/, NPR II https://www.npr.org/ & Rasmei Kampuchea Daily Newspaper II Home - Rasmei Kampuchea Daily (rasmeinews.com)

រក្សាសិទ្ធិ©ដោយ៖ ពេទ្យយើង